Gavana Samboja awashtumu wanasiasa kwa madai ya kuwagawanya wakenya kwa misingi ya kikabila

Na Godfrey Aluda / Mwarandu Kombe

Gavana wa kaunti ya Taita Taveta Granton Samboja picha (Maktaba)

Gavana wa Taita Taveta Granton Samboja amewataka viongozi wa kisiasa nchini kutowagawanya wakenya kwa misingi ya kikabila.

Akizungumza leo hapa jijini Mombasa wakati wa ufunguzi rasmi wa kongamano la viongozi wa kaunti hiyo gavana huyo amesisitiza haja ya wanasiasa  kuzingatia maendeleo yatakayowafaa wakenya.

Amesema msimu wa siasa umepita na kilichobaki ni kuwafanyia kazi wakenya.

Wakati uo huo, Samboja ameunga mkono kuchaguliwa kwa gavana wa Kakamega Wycliffe Oparanya kama mwenyekiti wa baraza la magavana nchini.

Samboja aidha amedokeza kuwa kuchaguliwa kwa gavana huyo kulitekelezwa katika njia ya uwazi huru na haki.

Itakumbukwa kuwa hivi majuzi gavana wa kaunti ya Kwale Salim Mvurya alipinga uchaguzi huo akisema kuwa kulikuwepo mkataba wa maelewano ili kumrithi aliyekuwa mwenyekiti wa baraza hilo Josphat Nanok.

Vile vile gavana huyo amesema baraza la magavana litahusika kikamilifu katika mchakato wa kuifanyia marekebisho katiba ili kugatua fedha zaidi mashinani.