Gavana Joho na hasimu wake wa kisiasa Suleiman Shahbal wazika tofauti zao za kisiasa

Gavana wa Mombasa Ali Hassan Joho akisalimiana na hasimu wake wa kisiasa Suleiman Shahbal. PICHA Mwarandu Randu

Mwarandu Randu na Godfrey Aluda

Gavana wa kaunti ya Mombasa Ali Hassan Joho na hasimu wake wa kisiasa Suleiman Shahbal wameamua kuzika tofauti zao za kisiasa kwa manufaa ya wakaazi wa kaunti ya Mombasa.

Wakizungumza na wanahabari leo katika afisi za gavana hapa jijini  Mombasa, Joho amesema kuwa tofauti za kisiasa sio kigezo cha kutengana na kuwekeana uadui baina yao.

Joho amedokeza kuwa ataendelea kufanya majadiliano ya mara kwa mara na mpinzani wake ili kutafuta suluhu  la  kudumu kwa changamoto zinazowakabili wakaazi wa Mombasa.

Hata hivyo gavana huyo amepongeza mwafaka wa maelewano baina ya rais Uhuru Kenyatta na kinara wa upinzani Raila Odinga.

Wakati uo huo, Suleiman Shahbal amewataka viongozi wa ukanda wa pwani kuzika tofauti zao za kisiasa na badala yake waangazie miradi ya maendeleo.

Shahbal hata hivyo ameitaka serikali kuu kuwapa kipaumbele wawekezaji wa humu nchini wakati wa kutekelezwa kwa mradi wa Dongo Kundu.

Amesema kuna haja ya serikali kuu kuzingatia kikamilifu wawekezaji wa humu nchini huku akisistiza kuwa wana uwezo wa kuteleleza mradi huo.

Gavana Joho Suleiman Shahbal na Gavana wa Nairobi Mike Sonko

Kwa upande wake gavana wa kaunti ya Nairobi Mike Mbuvi amewahimiza viongozi nchini kukumbatia mwafaka huo ili kuwanunganisha wananchi mashinani.

Aidha Sonko amewapongeza viongozi hao kwa kukubali kuweka kando tofauti zao za kisiasa na kuamua kushirikiana katika kukuza uchumi wa kaunti ya Mombasa.

Itakumbukwa kwamba gavana joho na Suleiman Shahbal walikuwa mahasimu wa kisiasa katika uchaguzi mkuu uliopita.